27 красавіка ў цэнтральнай раённай бібліятэцы імя Я.Янішчыц адбыўся вечар-сустрэча з пісьменнікам, кандыдатам філасофскіх навук, членам Беларускага саюза журналістаў і Саюза пісьменнікаў Беларусі Зіновіем Кірылавічам Прыгодзічам.
Зіновій Кірылавіч нарадзіўся 15 кастрычніка 1944 года ў вёсцы Лышча Пінскага раёна ў сям’і хлебаробаў. Скончыў факультэт журналістыкі Беларускага дзяржаўнага універсітэта, працаваў літсупрацоўнікам, затым загадчыкам аддзела газеты “Звязда” і “Советская Беларусь”. Зараз Зіновій Кірылавіч – галоўны рэдактар часопіса «Гаспадыня».
У чытальнай зале цэнтральнай раённай бібліятэкі сабраліся землякі Зіновія Прыгодзіча, навучэнцы Пінскага індустрыяльна-педагагічнага каледжа, члены клуба літаратараў Піншчыны “Пінчукі”, бібліятэкары. Зіновій Прыгодзіч расказаў пра сябе, сваю малую радзіму, пра творчы шлях, пра няпростую працу, творах і героях сваіх публікацый. На творчай сустрэчы аўтар расказаў пра сваю новую кнігу «Постаці: З цэлым народам гутарку весці…», якая змяшчае дзесяць гутарак з вядомымі дзеячамі беларускай культуры ў сферы літаратуры, музыкі, тэатра, малярства, скульптуры.
Перад прысутнымі выступілі члены Саюза пісьменнікаў Беларусі Марыя Іванаўна Ляшук і Анатоль Іванавіч Шушко. Цікавым, павучальным і эмацыйным быў аповед класнага кіраўніка Зіновія Прыгодзіча Яўгеніі Антонаўны Малашчыцкай. З вялікім захапленнем Зіновій Кірылавіч слухаў выступленні сваіх аднакласніц Анастасіі Максімаўны Побат і Аляксандры Уладзіміраўны Кавалёвай. Таксама выступілі зямлячкі Зіновія Кірылавіча бібліятэкар Лышчанскай сельскай бібліятэкі Марыя Іванаўна Прыгодзіч і паэтка Жана Мікалаеўна Верыч. У завяршэнні сустрэчы выступіла дырэктар дзяржаўнай установы культуры “Пінская раённая цэнтралізаваная бібліятэчная сістэма” Алёна Іванаўна Анташук. У бібліятэкі дзяржаўнай установы культуры “Пінская раённая цэнтралізаваная бібліятэчная сістэма” Зіновій Кірылавіч Прыгодзіч падарыў 87 экзэмпляраў кніг: “Постаці: З цэлым народам гутарку весці”, “Постаці: Сэрца мільёнаў падслухаць біцця…”, “Далёкае-блізкае”, “Сейбіты”, “Зямныя вузлы”, “Пути и перепутья”, “На земле Ямато”.
Ждите загрузки ссылки для показа изображений!
Удзельнікі фальклорна-этнаграфічнага калектыва “Крыніцы” Пінскавіцкага СДК выканалі для госця некалькі песень. Беларускія песні ў выкананні калектыва прыйшліся па душы і Зіновію Прыгодзічу, і ўсім удзельнікам сустрэчы.
К.Л.Міхалевіч, загадчыца аддзела бібліятэчнага маркетынгу ЦРБ імя Я.Янішчыц
