7 снежня 2016 г. ва ўстановах адукацыі Маскоўскага раёна стартаваў чарговы этап рэспубліканскага конкурсу прафесійнага майстэрства “Настаўнік года”.
Для большасці педагогаў конкурс прафесійнага майстэрства ‒ сродак самавыяўлення, форма самапрэзентацыі, пляцоўка для дэманстрацыі ўзроўню прафесійнай кампетэнцыі, агульнай культуры, творчага і кар’ернага росту.
Першым удзельнікам конкурсу стала настаўніца англійскай мовы ДУА “Сярэдняя школа №26 г.Брэста” Сталева Таццяна Фёдараўна. Цікавая прэзентацыя творчай педагагічнай дзейнасці прадстаўлена ў незвычайнай форме і атмасферы з удзелам адміністрацыі, вучняў і калег. Асоба настаўніцы шматгранная, кола захапленняў уразіла членаў журы. Яна цікавы суразмоўца, надзейны сябар, выдатны класны кіраўнік, падарожнік, маці і проста абаяльная жанчына.
На высокім узроўні прайшоў урок у Х “А” класе па тэме “Навуковыя дасягненні сучаснага свету”. Усе віды маўленчай дзейнасці, рэалізацыя міжпрадметных сувязяў (хімія, фізіка, біялогія), інтэрактыўныя метады і прыёмы, рэалізацыя кампетэнтнаснага падыходу ў навучанні замежнай мове ‒ усё гэта садзейнічала выхаванню полікультурнай асобы вучня.
У сваім эсэ “Вучыць дзяцей вучыцца” Таццяна Фёдараўна разважае над сакрэтамі прафесійнага майстэрства. Сутнасць педагагічнай творчасці заключаецца ў гармоніі чалавечых узаемаадносін. Яна педагог у трэцім пакаленні.
Таццяна Фёдараўна дае слушныя парады ўсім удзельнікам конкурсу:
Тварыце! Верце! Здзіўляйце саміх сябе і тых, хто побач!
І памятайце, што ўдзел у конкурсе ‒ гэта аб’ектыўная ацэнка сваёй прафесійнай дзейнасці; абмен вопыту з калегамі; вопыт публічных выступленняў, адкрытых урокаў; і самае галоўнае ‒ наступны прафесійны ўзровень.