Нагадаем, што помнік адкрылі 28 ліпеня бягучага года за 10 гадоў да фактычнага 1000-годдзя горада. Адразу выявіліся 70 выпадкаў нескарачэння “у” ў беларускамоўных тэкстах і яшчэ да 15 лексічных, факталагічных і стылістычных памылак. Чыноўнікі аблвыканкама паабяцалі паправіць сітуацыю да 10 жніўня. Да “працы над памылкамі” прыцягнулі нават Акадэмію навук Рэспублікі Беларусь. Цяпер вось, верагодна, праца перайшла ў практычную фазу.
У польскай і нямецкай мове таксама ёсць пазарадковыя знакі, так званыя “дыякрытыкі”. Наш карэспандэнт апытаў польскіх і нямецкіх знаёмых на прадмет магчымай рэакцыі людзей у іхнім горадзе на сітуацыю, аналагічную брэсцкай.
Анджэй, настаўнік:
– Калі б, скажам, у польскім тэксце на помніку ў літары “а” не было “хвосціка” – гэта неахайнасць скандальная.
Вось самыя характэрныя адказы, што было б, каб на нямецкім помніку не было “ўмлаўтаў”.
Юлія:
– Нядбайнасць у такой сітуацыі гэта ня надта добра.
Герд:
– Натуральна, быў бы скандал! Але было б важна, гэта зроблена наўмысна ці гэта проста тэхнічны брак.
Астрыд:
– Нямецкую мову нельга ўявіць без умлаўтаў. Альбо гэты помнік быў бы нейкаму кампутарнаму прыдурку, бо ў кампутарнай мове шмат што скарачаецца, альбо… У школе я заўсёды залічваю вучням такія выпадкі як граматычныя памылкі.