Кола прыхільнікаў Якуба Коласа – сучасныя аматары літаратурнага слова

Святочны настрой удзельнікаў пасяджэння раённага метадычнага аб’яднання дырэктараў устаноў адукацыі вызначыла не толькі пераднавагодняя дата.

Сустрэча адбывалася ў СШ №1 г. Лунінца. На гэтым месцы знаходзіўся будынак народнага пачатковага вучылішча, дзе ў 1911-1912 гг. знайшоў прытулак апальны настаўнік Канстанцін Міхайлавіч Міцкевіч. Тут будучы народны пясняр займаўся прыватнымі ўрокамі з юнымі лунінчанамі, тут ён пачаў пісаць славутую паэму “Сымон-музыка”, 100-годдзе завяршэння якой будзем адзначаць у 2018-ым.

Cёлета ж, дзякуючы літаратурна-музычнай візітоўцы школы – гаспадыні прыёму, я і мае калегі далучыліся да святкавання 135-годдзя Якуба Коласа (можна сказаць, з “удзелам” класіка нацыянальнай літаратуры – яго ролю выдатна сыграў 11-класнік Улад Волчык). Безумоўна, вытрымалі і рэгламент работы, абмеркаваўшы развіццё кіраўнічых кампетэнцый і кампетэнтнасці кіраўнікоў. Сваімі меркаваннямі аб сутнасці галоўнага пытання парадку дня падзяліліся дырэктары Юрый Васільевіч Коўшык (Дварэцкая СШ), Сяргей Рыгоравіч Бірыла (Кажан-Гарадоцкая СШ), Анатоль Яўгенавіч Якубовіч (Любачынская СШ). Злабадзённасць праблем быццам адышла на другі план перад вечнасцю геніяльнай творчасці паэта з вершамі лунінецкага перыяду, з яго шэдэўрам “Мой родны кут” – своеасаблівым гімнам прыгажосці малой радзімы кожнага з нас.

Кола прыхільнікаў Якуба Коласа – сучасныя аматары літаратурнага слова. СШ №1 г. Лунінца пашчасціла на здольнага паэта – настаўніца Наталля Аляксандраўна Яворская разам з вучнямі падрыхтавала вітальную праграму. Нашаму краю пашанцавала на захопленага радзімазнаўцу – журналіст, член ГА “Саюз пісьменнікаў Беларусі” Таццяна Васільеўна Канапацкая прадставіла чарговую кнігу з серыі “Лунінецкая памяць”. Пераднавагоднім падарункам удзельнікам пасяджэння стала выстава калядных ёлак (конкурс на стварэнне самай арыгінальнай “лясной прыгажуні” быў праведзены напярэдадні), віншаванні сапраўдным Дзеда Мароза і Снягуркі, чароўных дзяўчынак-“сняжынак” і сурьёзных “першаклашак”.

Святочны настрой падтрымлівала нават імправізаваная “зала пасяджэнняў” (старым праектам школы не прадугледжана сапраўдная), у якую на дзве гадзіны ператварылася рэкрэацыя. Перафразуючы радок Якуба Коласа, творчы “дух вітаў у высі”, натхняючы ўдзельнікаў РМА на шчырыя пачуцці ўдзячнасці, якія госці выказвалі дырэктару першай школы Галіне Уладзіміраўне Грамыка.

Алена ЯРМОЛЬЧЫК, дырэктар ДУА “Багданаўская СШ”,
кіраўнік РМА дырэктараў устаноў адукацыі