Twitter Виртуального Бреста Группа в одноклассниках

Брэсцкі Цэнтр укаранення навукова-тэхнічных распрацовак плануе палепшыць экалогію і стварыць унікальную антывірусную праграму

21  Октября 2011 г.  в 10:12 : Интернет, высокие технологии

Чалавецтва не перастае пераконвацца ў тым, што будучае – за навукай! Да банальнага простая думка даўно стала безапеляцыйнай ісцінай. Менавіта гэтым немудрагелістым дэвізам ужо больш за 10 гадоў кіруюцца супрацоўнікі КУП “Цэнтр укаранення навукова-тэхнічных распрацовак”. У 2008-м перспектыўнае прадпрыемства набыло статус тэхналагічнага парка вобласці, а сёння ў яго складзе – 11 новых навукаёмістых структур. Амбіцыйным інтэлектуалам, аб’яднаным агульнай справай, пад сілу нават змяніць экалогію ці стварыць антывірусную праграму, аналагаў якой у свеце няма! Але пра ўсё па парадку…

…ПРА ІНАВАЦЫІ

Цэнтр прадстаўляе інтарэсы Брэсцкага аблвыканкама, Беларускага інавацыйнага фонду і Дзяржаўнага камітэта па навуцы і тэхналогіях. Адсюль – багаты спектр паслуг: падтрымка прадпрыемстваў, задзейнічаных у сферы інавацый, развіццё трансферу тэхналогій у вобласці, стварэнне і ўдасканаленне новых відаў прадукцыі, а таксама кампетэнтныя кансультацыі па да-дзеных пытаннях. У спісе, які можна працягваць і працягваць, варта вылучыць распрацоўку інвестыцыйных праектаў і бізнес-планаў. Іх ужо каля 70.
Акрамя таго, навукоўцы дбайна сочаць за далейшым лёсам сваіх “дзецішчаў”: забяспечваюць належнай увагай кожны этап рэалізацыі падрыхтаванай праграмы – ад прыцягнення інвестараў да прасоўвання на тэрыторыі краіны ці за мяжой. Прычым пошук замежных партнёраў і новых перспектыў тут даўно ўвайшоў ва ўжытак і лічыцца адным з правіл прафесійнага кодэкса гонару.
Па словах Віталя Бонды, намесніка дырэктара цэнтра па камерцыйных пытаннях, добрай рэпутацыяй можа пахваліцца і служба IT-праектаў. У прыватнасці, таленавітыя праграмісты спецыялізуюцца на стварэнні аўтаматызаваных сістэм кіравання, інфармацыйна-аналітычных сістэм, а таксама інтэрнэт-сайтаў і парталаў. З ліку іх найбольш вядомых дасягненняў – распрацоўка і суправаджэнне сайта аблвыканкама, некаторых гар- і райвыканкамаў.

…ПРА ЭКАЛОГІЮ

Брэсцкі Цэнтр укаранення навукова-тэхнічных распрацовак плануе палепшыць экалогію і стварыць унікальную антывірусную праграмуХвалююць супрацоўнікаў цэнтра і праблемы навакольнага асяроддзя. Прафесійны інтарэс да іх прадыктаваны звычайным жаданнем дыхаць чыстым паветрам і піць крыштальную ваду. З другасным выкарыстаннем бытавых камунальных адходаў, напрыклад, звязаны шматлікія навуковыя пошукі. Лінія па перапрацоўцы смецця ад рэзідэнта тэхнапарка прыватнага прадпрыемства “Сіфанія – Экатэхніка” карыстаецца папулярнасцю не толькі на радзіме. У суседняй Расіі на яе аснове створана 7 прадпрыемстваў. Да таго ж кампанія выйграла тэндар на будаўніцтва буйнога смеццеперапрацоўчага завода ў Магілёўскай вобласці. Наступным сур’ёзным крокам для “Сіфаніі”, безумоўна, стане выхад на еўрапейскі рынак.

Адходы з лёгкасцю ператвараюцца ў даходы. Спецыялісты тэхнапарка цэнтра дэманструюць тое, што інакш, як сапраўдным прамысловым цудам, і не назавеш: апілкі ці салома становяцца брыкетам, пластыкавыя бутэлькі – трубамі. Нават актуальнае для берасцейцаў пытанне ачышчальных збудаванняў і непрыемнага паху, звязанага з імі, знайшло адлюстраванне ў дзейнасці ўстановы.

Супрацоўніцтва з навуковымі дзеячамі краіны дазваляе выпрацоўваць эфектыўныя метады змяншэння колькасці шкодных выкідаў у сцёкі водных артэрый вобласці. А шматлікія семінары па тэме сталі своеасаблівым рупарам для зацікаўленых.

– Адметнасць падобных праектаў у тым, што мы прапануем вырашэнне праблемы за адносна невялікія грошы, – тлумачыць Вячаслаў Кірылюк, дырэктар Цэнтра ўкаранення навукова-тэхнічных распрацовак. – Падрабязней даведацца пра дзейснасць падобных тэхналогій можна будзе 1 лістапада на семінары, які пройдзе на базе РУСП “Селекцыйна-гібрыдны цэнтр “Заходні”.

Навуковая сустрэча пад назвай “Сучасныя тэхналогіі ачысткі сцёкаў жывёлагадоўчых комплексаў і біягазавыя ўстаноўкі” закране праблемы ўтылізацыі арганічных асадкаў сцёкавых вод, спосабы ўтылізацыі гною і іншае. Навукоўцы раскажуць аграрыям, як можна паспяхова займацца любімай справай, не забруджваючы пры гэтым наваколле. І, што самае важнае – з мінімальнымі фінансавымі выдаткамі. Словам, і танна, і хітра! За больш дэталёвай інфармацыяй наконт удзелу ў семінары, а таксама па іншых пытаннях супрацоўніцтва звяртайцеся па тэлефонах: 8(016)21-28-44 (тэл./факс), 21-55-26, 21-21-89.

…ПРА ПЕРСПЕКТЫВЫ

Яны, па вялікім рахунку, звязаны з навуковым супрацоўніцтвам за межамі рэспублікі, узаемавыгадным экспартам прадукцыі і паслуг. Ды гэта – глабальнае! З таго, што знаходзіцца побач, літаральна на адлегласці выцягнутай рукі, асаблівая ўвага надзяляецца ўнікальнаму ноу-у, якое спецыялісты цэнтра распрацоўваюць сумесна з маладымі навукоўцамі і іх выкладчыкамі з Брэсцкага дзяржаўнага тэхнічнага ўніверсітэта. Гэта антывірусная праграма, заснаваная на выкарыстанні штучнага інтэлекту. Сёння навукоўцы актыўна шукаюць інвестараў, якія дапамогуць ажыццявіць ідэю. Распрацоўка, дарэчы, з разраду суперэксклюзіву, аналагаў якому грамадскасць пакуль што не прыдумала. Можа, яна назаўжды пераверне сучасныя ўяўленні ў галіне камп’ютарнай бяспекі і праславіць сваіх аўтараў як інтэлектуальных рэвалюцыянераў новага пакалення…

Ніна ЛЕАНАВЕЦ, “НТ”.